نصائح مهمة للمقبلين على شراء مرسيدس

السلام عليكم اخواني الافاضل هذا الموضوع اعددته بسبب جهل الكثير منا بماركة مرسيدس الفارهة ندخل بالنصائح :

١- عند رؤيتك لاعلان سيارة بحراج اقرأ التفاصيل بدقة اولا هي استخدام سعودي او خليجي او امريكي او الماني مو علشان الحرارة والخرابيط هذي لانه كلام جهال كلهم من مصنع واحد الفرق بالمواصفات والسعر

٢- عليك بالمواصفات السعودية او الخليجية تجي ممتازة جدا خصوصا اللون الابيض او الؤلؤي او الاسود والعنابي فخم جدا بنظري والداخلية افخهم الاوف وايت وارضية سوداء وابتدو عن الامريكي والياباني داخليتهم بالغالب اسوداو رصاصي تجيب الهم

٣- المواصفات الداخلية كثيرة جدا مثلا اللي يقولك موتر فل كامل اغلبهم كذاب يحسب اذا فيها فتحة صارت فل !!!

مواصفات الفل وهي :

سقف بانوراما رؤية ليلية رادار مساج لجميع المراتب تسخين وتبريد جميع المراتب ذواكر مراتب امامي وخلفي ( نادرة بالخلفي ) ثلاجة بين المقاعد الخلفية ، تكييف خلفي بتحكم مستقل بازرار تحكم كهرباء بجميع المراتب ، شاشات خلفية بتحكم بالتكاية انتبهو اغلبهم يركبوا شاشة تجارية من الغرابي، طاولات طعام ، ديناميك للمراتب الامامية تعمل على انتفاخ اطراف المراتب عند اللفات الحادة ، داخلية ديزاينو

ستائر جانبية وخلفية كهرباء وهذي المواصفات غالبا تجي ب ٦٠٠ طراز القمة وموجودة ب ٣٥٠ و ٥٠٠ طلبية من الوكالة غير هذا الكلام يعتبر الموتر نصف فل لا احد يلعب عليكم

مواصفات الامريكي اسوأهم على الاطلاق تجي سياحي على الاغلب وتجي شاص قصير ونادر الطويل فيهم ومشهورين بالفتحة العادية الكرستال والداخلية السوداء ومكيف واحد فقط وبدون تحكم مراتب بالخلف وبدون ستائر جانبية كهربائية بالمختصر بانوراما بالشكل فقط وسعرهم رخيص جدا وتنفع للي ماتهمه المواصفات ولكن بيعها ثقيل جدااااا

٤- وهو الاهم ابتعدو عن فئة الدفع الرباعي 4 matic هذي بلوة كبيرة جدا بطن السيارة ماله قطع بالمملكة يختلف كليا عن العادية حتى مساعدات الهيدروليك تختلف كليا وماتحصلها مهما زين لك البايع او حلف ان قطعها رخيصة فهو كااااااذب حتى فئة e class الامريكي يجي e350 4 matic هذي مصيبة حتى كندية او مواصفات خليجية ماتصلللح ويطلبون فيها اسعار خيالية وهي ماتسوى هللة وبعضهم يسيل الاستيكر حق الدفع الرباعي تقدر مع اقرب ورشة مرسيدس يطلعها لك عادي او رباعي ٥- ابتعدو عن حجم ٣٥٠ بالبانوراما تماما سيئ بمعنى الكلمة ويشتكي من مشكلة تروس الماكينة وعمود التيمن والثلاجة والعزم السيئ على وزنها المرتفع عليكم ب ٥٠٠ صبورة وعزم وتنفع خطوط وكل شيولا احد يقولي صرفيةاللي يشتري بانوراما المفروض يكون قدها

٦- انتبهو عند فحص سيارة طفيها واضغط زر البصمة ان وجدت بدون فرامل تولع انوار الطبلون كلها لمبة الماكينة والايرباق اذا ماولعو السيارة وراها مصيبة كبيرة جدا اتركوها مباشرة وقول لراعيها الله يرزقك بدون تفاهم هذي حيل شريطية يطفون لمبة الماكينة عشان لا تدري ان فيها مشكلة بحجة انها حساس شكمان وهم كاذبين

٧- البانوراما تجي شكلين كت عادي ستاندر وكت amg ويركبون عادي اهم شي اذا معدلة انتبه للتعديل هل صيني او تايوان والشمعات اصلية او تايوان وتقدر تعرف من علامة مرسيدس بنفس الشمعة

هذي صور الامريكي والياباني عشان تنتبهون

اي استفسار حاضرين ياشباب وبالتوفيق ان شاء الله